Sawmnak By Van Lian Thang

Dear Dawtmi hawidawt hna,

Ramleng ummi kan khuami dihlak nih fak ngaingai in tulio kan khua kong khua kan ruah a herh ko. Cubantuk caah lam um chun cu na ruahnak, na hmuhning, na saduhthah le na thinglung put hi biaruahnak ah chim cio a herh. Chuahpi cio a herh.Tu lio ah khua tampi cu an khua development caah thil tampi an tuah cang.Lungrualnak, thanchonak le modern village ah an khua cu an ser cuahmah cang. Khua ram thatnak caah a sing sang in phaisa an thawh, thazaang an pek, ruahnak an chuah, project an ser i, ramleng harsa tiang tanpinak an kalpi cang.

Tulio ah kan khua hi, a holh kho siseh law, a retheih ning, a paw a tam ning, mi hmai a hngar ning, an hlam ning, na hmurka theih a duhning a tah in a kan tah hnawh hnawh hrim lai ka zumh.

Hitluk kan khuaram remh a herh tuk lio, developed a herh tuk lio, kan ruahning le kan thinlung cawisan a herh tuk lio, kan moral cawikan a herhtuk lio, retheihnak in lomhnak ah, sifahnak in rumnak ah, tahnak in nih nak ah, pawtamnak in khimnak ah, mit kutdawh sinak in mi bochantu sinak ah, puan lu khuh in, a hrum ai cuahmah lio ah, khua caah duty ka ngei hrimhrim ti mi spirit he kan tan a herh. Kan lungrual a herh. Kan dirti hna a herh. Kan ruahning kan i share cio a herh. Cu tharchuah khawhnak ding ah, hi kan biaruahnak hi kan support cio hrimhrim a herh hmasat. Kan i theih dih a herh hmasat. Kan ruahning kan hmuhning kan i theih a herh hmasat. Ramleng chuak kan khuami directory kan siam a herh hmasat. Khat le khat kan i sawm cio hna a herh hmasat. Cu cu a tlam a tlinnak dingah tuanvo kan ngei cio hna. Tuah ding kan ngei cio hna.

Ramleng chuakmi kan i lungrual taktak cun thil nganpi pi khua le ram caah si seh, pawngkam ca tiang in, zohchunh awk tlak le thatnak tampi kan chuahpi khawh hrim lai ka zumh. Cucu a tu theng te ah kan khua nih a kan siaherhbik mi le a kan tahhnawhmi le a kan au hnawhh cuahmah mi a si tiah ka ruat.

Cucu hlawh a tlinnak dingah fakpi in kan sawm duh ko hna!


Van Van ( Van Lian Thang)